澳門嘅上樓花舫，曾經紅極一時，遍地開花，出現咁嘅情況，主要有三大原因。第一新建成嘅大廈林立，提供生存空間畀呢啲舫主，就算遭妓院老闆們封殺，但喺新大樓或者娛樂場嘅保護下，就能繼續生存；第二就係當年避風塘嘅舫主艷名遠播，一眾玩家都對佢哋念念不忘，後嚟佢上樓重操故業，吸引大批脂粉客慕名而來，令生意滔滔不絕；第三就係夠晒安全，畀熟人見到，都可以話去娛樂場玩或去某大廈辦公，唔似你行入福隆新街，係人都知道你嚟嫖妓，所以多咗好多家有嚴妻嘅朋友嚟偷食。至於後期點解式微，主要原因係呢種玩意，變為純色情服務，客人一嚟唔使飲酒聽歌，就直接入房，加上抽唔到稅，引起政府不滿，決定取締，而且經過十年八年嘅發展，當年嘅舫主都人老珠黃，加上冒名頂替嘅太多，服務質素大跌，於是漸漸被玩家唾棄，花舫玩意慢慢走下黃色事業嘅歷史舞台！