尋日上咗去大富豪桑拿同老友吹吓水，突然聞到大廳傳嚟一陣苦瓜嘅香味，原來大廚正炮製涼瓜炒牛肉，除咗豆豉特別濃香之外，連苦瓜都瓜香撲鼻，於是忍唔住問吓大廚做乜啲苦瓜咁香噴噴？大廚話佢用咗江門嚟嘅杜阮苦瓜，據講呢種苦瓜係全廣東最出名，瓜身翠綠肥大，肉瘤大而密，肉質爽脆甘甜。而大廚仲用最靚嘅陽江豆豉嚟炒，啲豆豉一落鑊爆起，就已經香到不得了，跟手炒埋啲苦瓜，苦瓜吸收晒蒜頭同豆豉嘅香味，最後放埋新鮮嘅滑牛，輕輕一炒已經可以上碟。呢種苦瓜苦味特濃，但食完嘅回甘味道就令人別有一番風味，加埋滑牛嘅濃郁肉汁，配埋陽江豆豉嘅香味，真係極品。所以普通菜式都唔好睇小，只要師傅肯下工夫，亦一樣可以整出人間美味！