歐美四仔女星多數都大大件兼夾豐滿肉感，相比之下日本AV女優則注重身材纖巧，兩者皆有捧場客。無獨有偶，來自歐美同日本嘅三級片女星亦有類似情況，好似黑木瞳就以其清雅氣質吸引觀眾，身材只係次要。
黑木瞳於1960年出生，出生地為日本福岡縣黑木町，本名叫做伊知地昭子，後來進軍藝能界就取黑木為藝名嘅姓氏。就讀福岡縣立八女高等學校嘅時候，黑木瞳已經對演戲有濃厚興趣，所以參加學校嘅話劇社。而鑽研話劇演出嘅同時，因為睇得劇本多，亦培養出寫作興趣，更出過詩集，包括《長袖之秋》、《夜這青空》等，可以話係貨真價實嘅才女。某日，日本知名嘅寶塚歌劇團去到福岡演出，而黑木瞳就去欣賞舞台劇《凡爾賽玫瑰》，呢個時候就令佢下定決心加入劇團，佢高中畢業後毅然去到寶塚音樂學校面試，憑其清秀氣質、水準甚高嘅演技以及對話劇嘅認識而獲得取錄，第二年更以劇團史上最快速度躍身成為首席花旦添！
加入劇團四年之後，黑木瞳就離去轉向電視圈發展，第一部電視連續劇叫做《都之風》，其演技備受讚揚，仲搵到參演第一部電影《化身》嘅機會。當中黑木瞳唔單只施展渾身解數演好八島霧子呢個角色，更加為藝術而犧牲，作出大膽嘅裸露。而憑其出色嘅演繹獲得有日本奧斯卡之稱嘅新人獎殊榮，實力得到充分證明。之後，黑木瞳大受歡迎，獲邀拍攝唔少電視劇、電影同綜藝節目，家陣已經成為天后級人物。而黑木瞳參演電影以來，除《化身》裸戲唔少之外，仲有《姐御》、《略奪愛》等，至於最令人印象深刻嘅作品就梗係《失樂園》啦。於《失》片當中，飾演已婚婦嘅黑木瞳同有婦之夫發展一段難捨難離嘅不倫之戀，二人多次享受雲雨之情，過程當中黑木瞳將角色心中對愛慾、性慾嘅渴望由淺到深咁盡情展露，呻吟與呼吸聲以及表情都充斥住強大嘅慾念，令人畢生難忘，所以作品獲獎無數，而黑木瞳亦憑此片獲得日本電影學院嘅最佳女主角獎。
撰文：賢