早前西班牙有一對年輕男女，路過一個農場時慾火焚身，於是兩人嚟番場野外戰，之但係佢哋好揀唔揀，揀咗鋪有木板嘅水井上面開戰，結果因為動作太過激烈，以致木板斷開兩截，男主角僥倖冇跌落井，但21歲嘅女主角就半裸咁直墮4.6米深嘅水井當中，更不幸嘅係男方竟然冇想辦法救女方出嚟，反而第一時間逃離現場，唯一慶幸嘅係個女子識游水，仲有部手機喺衫袋裏面，於是佢即刻報警求救，最後警方成功將佢救出，經過身體檢查後，並無大礙。唔少網友對該男子嘅表現感到十分不滿，大罵佢見死不救，亦有網友懷疑，兩人並非情侶，懷疑喺酒吧或夜店遇上玩一夜情，但搵錯地方親熱，先至搞出個大頭佛。總括嚟講，個男仔拂袖而去，點都唔啱，大家千祈咪學佢呀！