家陣好多外國嘅女歌手玩性感玩到過晒火位，好似Lady GaGa同Miley Cyrus出席公眾場合同演出MV都極盡淫穢之能事，都唔知佢係脫星定係歌手。其實佢哋應該學經典意大利性感女星歌莉亞姬坦（Gloria Guida）咁，唱歌還唱歌，拍脫戲就拍脫戲。
意大利喺上世紀七、八十年代，興起一片情色喜劇熱潮，呢個風潮仲影響到當時嘅四仔界，亦一樣咁鍾意拍喜劇型四仔。呢段日子當中，由於情色喜劇需求上升，遂令唔少意大利女星紛紛湧現兼且毫不吝嗇咁大拍光豬戲。眾多知名意國性感女星，除咗有之前為大家介紹過嘅愛雲芬芝，仲有今日為大家介紹嘅歌莉亞姬坦。1955年出生嘅姬坦誕生於意大利北部小鎮梅拉諾，後來舉家搬到博洛尼亞居住，據講係為咗姬坦於更佳嘅生活環境成長，以及接觸更有質素嘅教育。不過，佢父母嘅努力可算白費，因為姫坦長大之後就去咗做歌手，仲出過兩隻唱碟。而成為歌手之前，當時16歲嘅姫坦仲去參加一個叫做青少年小姐嘅選美比賽得到冠軍。姫坦清新脫俗嘅氣質，迷人嘅眼神以及婀娜身段，仲令佢做咗幾年模特兒。
歌莉亞姬坦好身材又靚女，仲充滿青春氣息，最啱就係拍當年盛極一時以校園為題材嘅青春電影，意大利電影界梗係唔會放過佢啦！1974年，姬坦踏足電影圈，演出嘅作品亦多數以扮演學生妹為主，例如《那淘氣的年華》、《女高中生》、《俏校花》以及《校花師生戀》等。基於姬坦扮相斯文又不失少女嘅佻脫活潑，令佢人氣漸漸上升。而姬坦喺演戲嘅時候仲不忘展露歌喉，令作品更添精彩。佢雖然係初踏影圈，但係就冇諗過吊高嚟賣，好快就接受裸露演出，而咁多脫衣作品中就以《藍色牛仔褲》（Blue Jeans）嘅演出最令人印象深刻。戲中姬坦扮演一位流離浪蕩嘅少女，閒來更加為咗錢而同人進行性交易，而佢最鍾意就係穿上藍色牛仔褲，由於呢條褲短得緊要，所以每次從後面睇都幾乎露出半個臀部，性感非常，加上姬坦於戲中大剝特剝，雖然冇乜激情床戲，但係依然充滿誘惑，亦由於冇乜調情場面，令其形象多添一種健康感覺，順眼又自然。
撰文：賢