以前成日聽見人話女人三十爛茶渣，但係時移勢易，家陣女人三十依然貌美如花，好比剛剛綻放嘅玫瑰花，唔識貨嘅肯定係老眼昏花。如果大家都係識貨之人，宮本真希呢位美魔女就一定要落足眼力仔細欣賞喇。
好多日本女演員都深諳駐顏之術，好似天海祐希、米倉涼子、小雪等都已經年過三十好多年，但係十年前見佢哋係咁款，十年後一樣覺得眾女依舊咁美艷動人，散發住一種令麻甩佬乃至花靚仔都為之神魂顛倒嘅風韻同魅力。除咗佢哋之外，差不多同期嘅宮本真希一樣係不可多得嘅美魔女。真希今年三十有六，面上唔單只冇皺紋，仲保持到一種少女氣質，嬌俏兼帶活潑，加上標致嘅五官以及攝人眼神，實在係嬌艷不可方物，絕對係美魔女中嘅典範。此外，真希呢副34-24-35胴體婀娜多姿，肌膚細滑幼嫩，胸前嘅F奶形質俱佳，實乃一對難得嘅美巨乳。
宮本真希之所以咁有氣質，可能因為佢生於富裕之家，因為佢阿爸係一間建設公司嘅老闆。之不過，佢阿爸喺真希19歲時候與世長辭，見唔到真希點樣走上成名之路，認真可惜。1994年，真希讀完高中，有幸獲得寶塚音樂學校取錄為第82期學生。修讀兩年之後，真希對於唱歌同演戲都已經大有進步，於是就被正式安排成為日本知名嘅寶塚歌劇團成員。同年，阿妹仲被藝能事務所睇中，搵佢加入女子組合T.a.p.，亦因為呢個機會，幫助真希踏足影視圈，更於1999年被提拔擔正做電影《玩具》嘅女主角。真希喺呢部作品瞓身演出，首次裸體上陣。由於表現出色，更奪得有「日本奧斯卡」之稱的第23回日本電影學院獎的新人演員獎以及第11次東京國際電影節的最優秀女演員獎。到今時今日，真希嘅演技亦一樣備受讚賞，唔信大家可以睇吓近期佢同型男高橋克典主演嘅電視劇《刑事》啦。
宮本真希唔係成日更新博客，但係一有消息，都係宮本真希嘅一些大事，令佢有深刻感受，大家不妨多加留意，了解一下佢嘅內心世界。
網址：http://ameblo.jp/miyamotomaki-palette
年齡：36歲
身高：5呎4吋
三圍：34F-24-35
撰文：賢