話說以前嘅青樓女子，平日好少出門，偶爾只會去吓當舖或者寺廟，佢哋去寺廟除咗求神問卜，原來仲會請啲「神油」返妓寨，令佢哋客似雲來，寺廟有「神油」賣？唔係啩？大家咪心邪先，寺院出售嘅「神油」，唔係畀客人壯陽用嘅，而係當客人同囡囡溫存咗一晚，喺分手嘅時候，囡囡要裝作百般唔捨得，為求效果逼真，當然係眼淚鼻涕一齊流先至感人，咁點先可以即時聲淚俱下呢？喺啲「喊口婆」嘅介紹下，囡囡會去寺廟求啲萬年香油返嚟，只要搽少少喺鼻哥窿，話咁快眼淚鼻涕就會一齊嚟，客人自然被打動，一得閒就嚟搵你，當然豬籠入水。至於「喊口婆」係乜水？話說當時有親友過身後，怕靈堂太冷清，會特意請啲喊得嘅阿嬸返嚟為死者哭喪，呢啲喊口婆要喊就喊、七情上面，好多時唔喊得咁多，就焗住要靠呢啲「神油」幫忙，有囡囡見佢哋咁喊得，於是虛心請教，自此呢個秘技就喺青樓中廣泛流傳。