回想香港電影圈能夠一脫成名嘅女星真係十隻手指都數得晒，而今日要介紹嘅呢位女星絕對係其中一個幸運兒，1973年參加沙灘小姐選美大賽獲得冠軍殊榮，之後喺1975年拍咗人生第一套電影，佢就係林建明！
人稱「大姐明」嘅林建明，喺《歡樂今宵》嘅搞笑形象，一直深入民心，但原來佢初出道時，係全靠一脫成名，當時參與嘅第一部電影叫《社女》，社女嘅意思係指當年被圈禁喺架步從事賣淫工作嘅女性，故事講述初出茅廬嘅「大姐明」，出嚟社會後遇人不淑，愛上咗個姑爺仔，後來為咗愛人，甘願被賣入火坑，最後女主角飽歷滄桑，見盡世間人情冷暖，最後掙脫魔掌出家為尼，從此青燈作伴，故事係就係老套啲，但卻成為了經典電影！
片中不乏情慾情節，而大姐明一啲都唔錫身，好多幕都裸露上半身演出，當然冇露點啦！但已經令觀眾驚喜萬分，最爆就係電影海報，「大姐明」除咗半裸拍攝外，仲剃光頭上陣，當時單係為睇佢個光頭Look入戲院捧場嘅朋友，已不計其數。但原來劇情中佢變成光頭，並唔係自願，而係賣淫時被客人老婆捉奸夾硬被剃光頭，之後「大姐明」喺戲中戴上不同假髮大坃變裝誘惑，到最後出家就唔使再剃頭，首尾呼應到無嘢好講！
撰文：小德