每個行業有競爭先有進步，對於市民大眾亦得益。藝能界亦係一樣，乃木坂46就係為咗挑戰日本超人氣美少女組合嘅王者地位而出現，而衛藤美彩就係乃木坂46嘅王牌成員喇！
香港樂壇雖然有好多新人，但能夠橫掃各大頒獎典禮嘅歌手都係嗰一兩個，而喺日本樂壇亦有類似情況，因為提到出色嘅組合，近年大家都只會想起AKB48。老實講，呢班妹妹仔又靚女又夠活潑可愛，部分仲相當好身材兼不時拍泳裝照惹人遐想，但係來來去去都係呢班女仔，又真係幾悶。不過，幸好嘅係兩年前就出現咗一個新組合，同樣亦係一個青春無敵又好動嘅美少女組合，呢個就係乃木坂46，而衛藤美彩就係組合嘅代表性人物之一喇。21歲嘅美彩生得嬌俏可人，氣質清新脫俗，其斯文婉約嘅感覺仲好似鄰家少女。然而，阿妹斯文得嚟面上仲散發開朗氣息，一睇就覺得佢活力十足冇時停。身材方面，美彩胴體雪白嬌嫩，上圍仲有甚有睇頭嘅C奶，整體上不失辣味，正！
衛藤美彩現時人氣相當旺盛，其實佢一出道參與藝能活動就已經得到幸運之神眷顧。美彩佢喺2010年出道，當時已經係活躍於日本大分縣嘅組合CHIMO之領導人。後來，電視節目《倫敦Heart》舉行大型選美活動「AKG47」，從日本47個都道府縣選出代表，美彩就係大分縣嘅代表喇。之後，美彩轉戰由「Miss雜誌2011」舉辦選美活動，更加憑住青春活力奪得冠軍。呢個時候，為咗挑戰AKB48而成立嘅乃木坂46正進行選拔，阿妹就挾住冠軍之名參加，成功從接近三萬九千名參加者當中脫穎而出，成為36個成員其中之一。成為乃木坂46成員之後，美彩一直都表現出色，經常成為演出台柱。之但係，人紅自然是非多，仲冇晒私隱。早前，美彩同男友仔喺網上嘅對話居然被人發現，由於佢同事務所簽約有一項唔准拍拖嘅條款，而事件曝光之後就令事務所為之震驚。幸好，最後美彩都冇被踢出乃木坂46，可謂相當驚險。
乃木坂46特別為各個成員設立專頁，當紅嘅成員衛藤美彩當然亦唔例外。Click入去之後，除咗可以睇到好多美彩嘅寫真，仲會搵到好多由美彩演出嘅片段添。
網址：http://www.nogizaka46.com/member/detail/etoumisa.php
年齡：21歲
身高：5呎5吋
三圍：32C-23-31
撰文：賢