正月期間，同大家講個有關當年妓院故事。話說六、七十年前，福隆新街一帶嘅妓院，過年前幾日就已經陸續提早收爐，老闆計好花紅，出晒糧，伙記和囡囡有屋企就返屋企，有鄉下就返鄉下，跟手就落閘鎖門，十幾日後揀好日子至再開門做生意。但不少囡囡都係自小畀人賣落火坑，根本無父無母無親人，所以只能一個人留喺澳門過年，最慘就係全副身家都跟身，而妓院又唔住得，惟有住喺大酒店，但大酒店租金都幾乸脷，十幾日要自己「打皮」，真係肉都赤埋，於是佢哋就會預早約定啲老相好，喺過年期間上酒店短聚。由於新年流流，單係紅包都已經夠和味，之後一夕風流，肉金更係唔少得，所以計落唔使蝕仲有賺，但佢哋非常錫身，每日只限做一個，同喺妓寨時一樣。但萬一唔好彩，雙喜臨門，囡囡「姨媽」到訪，咁就對不起，冇收入之餘仲要蝕埋房租啦！撰文：小德