近年香港動作電影雖然多，但係來來去去都係嗰幾個男演員，女演員真係冇幾多個。呢個情況喺外國都係差不多，咁就更加令人懷念好波又好打嘅一代動作波后施比爾丹寧喇！
出生於1952年嘅施比爾丹寧（Sybil Danning）血統都幾複雜，阿媽係奧地利人，而爸爸就係德國、荷蘭同美國混血兒。而佢阿媽後來就改嫁咗個美國軍人，一家人於美國新澤西定居。後來唔知咩原因，一家人又飛到去德國生活。不過，由於後父要調去日本美軍基地，但係又唔可以攜眷，於是阿媽就帶咗施比爾丹寧返娘家。然而，呢個後父鮮有匯錢養家，搞到施比爾丹寧14歲就輟學打工搵錢。佢一邊做牙醫助理一邊讀美容文憑，長大之後仲一心開美容院，好可惜當時有關部門就話當地已經有五間美容院，所以唔發牌照畀佢。好在，施比爾失落之餘得到電影公司老闆賞識，搵佢做化妝，之後有位德國導演見佢又靚女又好身材，於是搵佢拍攝其演藝生涯第一部電影《Come, My Dear Little Bird》。
初踏影圈，令施比爾丹寧對自己嘅演藝事業充滿夢想，不過佢都知道自己有不足之處，於是就去到慕尼黑接受三年演戲訓練。雖然其演技的確有所提升，但係大家都係注意佢嘅身材多啲。因為當佢轉戰荷里活之後，好多片商都睇中佢一副高挑又健美嘅身材以及強悍外形，於是陸續有人搵佢拍槍戰片同古裝武打片，好似《叢林戰士》、《武士屠龍》以及《勇敢女王》等，而佢除咗表現出一副好身手，為佢贏得老牌電視節目《今晚娛樂》封為「國際第一動作女星」之外，袒胸露臂、豪乳蕩漾嘅火辣造型仲迷倒萬千男兒。為佢之後由動作女星變成艷星，拍下唔少情色片，包括《農夫偷香記2》及《我的妹妹是狼人》等，全部都全裸上陣兼且同男主角激戰連場。當中最誘惑嘅作品係《玩火》，施比爾丹寧扮演成熟女教師，百般色誘後生男仔，過程極似AV情節，大家有機會一定唔好錯過呀！
撰文：賢