睇鹹片可能係好多人嘅嗜好，小弟就係其中之一，每次睇完之後，都覺得壓力得到釋放。早前，美國馬里蘭州大學搵咗老鼠做研究，發現畀佢哋經常見到有關性愛嘅圖像，其認知力以及腦細胞俱會上升。至於睇鹹片又對腦細胞有冇幫助呢？美國嘅性調查期刊就話係冇嘅，甚至有負面影響。該期刊搵咗28個身心健康嘅男士協助研究，進行研究嘅時候分別畀帶有正面訊息、負面訊息、中性訊息以及鹹片佢哋睇，最後得出嘅結果係佢哋睇完鹹片之後，認知度以及記憶力變差。唔怪之得我雖然冇晒壓力，但係成日冇乜記性啦，都係睇少啲鹹片為佳！
撰文：賢