女人兩片朱唇塗上色彩艷麗嘅唇膏潤飾一番，的確係引得男人心癢癢，好想同對方唇貼唇交流一下。不過，到底係咪只有紅色唇膏先最令男人感到火辣辣呢？答案係肯定嘅！早前，英國曼徹斯特大學嘅科學家做過一次有趣嘅實驗，佢哋搵嚟一班男人，叫佢哋坐定定睇靚女相片，每張睇10秒鐘，期間有先進儀器監測住佢哋嘅眼球活動。結果，發現佢哋每當見到塗上紅色唇膏嘅靚女相片時，雙眼平均用上7.3秒望住紅唇，而望相中人雙眼只係用0.95秒！可見紅唇的確係吸引力強。至於相片當中有靚女塗上其他顏色唇膏，如粉紅色等，班男人平均只係用6.7秒去望咋。女人們如果想更加吸引男人嘅目光，不妨多塗鮮紅色唇膏喇！