家陣搖吓部智能手機就識到女仔，再唔係上交友網，大把女仔任你揀，但記得以前六、七十年代，港澳兩地冇電腦又冇手機，點樣識女仔呢？原來係靠玩「筆友」，即係靠書信往來嚟交朋友，當年有唔少主打年輕人嘅雜誌都會有筆友欄，你想交筆友嘅話，只要把你嘅喜好資料同通訊地址寄去雜誌社，佢哋刊登出嚟之後，睇啱嘅朋友就會寄信畀你吐心聲，你啱心水嘅就繼續回信做筆友。當時港澳兩地嘅筆友不知幾多，一來澳門女多男少，若論有型靚仔，香港仔點都係秤先好多，所以深受澳門囡囡嘅歡迎，而香港仔揀澳門妹嘅原因，一來澳門妹比較純，二來難摸上門，就算自己扮帥哥定有老婆都唔怕，但同目前網上交友一樣，最關鍵就係相約嗰一刻，而女仔人家一個人過香港，當然唔得啦！所以通常都係港男過江會筆友，而約見地點冇理由喺賭場或酒店，所以大多數都係大三巴同埋南灣嘅銅馬花園茶座。