中外唔少艷星之所以有性感演出，於銀幕上又姣又淫，好多時都係基於劇情需要，當然最重要係滿足觀眾嘅需要啦！不過，卻有艷星無論拍戲定係日常生活都咁放蕩嘅例子，好似狄美摩亞咁，最近又畀人影到佢同剛剛溝到嘅嫩男攬攬錫錫喇。
狄美摩亞於1963年出生，身世都幾坎坷，因為出生之前，生父就拋棄其母，阿媽大住個肚四處飄泊。到狄美出世，佢阿媽就返頭嫁。狄美嘅繼父係酒鬼一名，後來仲自殺身亡。狄美16歲已經自力更生，得人引薦之下演出驚慄片《Parasite》，之後演出肥皂劇《綜合醫院》，喺影視界嶄露頭角。年輕時候嘅狄美天生麗質，清雅脫俗，令男人暈得一陣陣，亦幫助到狄美爭取到重要嘅演出席位，1982年一套《No Small Affair》就由佢擔演女主角喇。不過，以上都唔夠一套鬼片對狄美咁有助力，呢套就係超級經典嘅《人鬼情未了》喇。狄美同男主角嘅傾情演出極之感人，一幕互相依偎搓黏土到家陣仲令人記憶猶新，而此作亦令狄美火速彈起。
狄美彈起之後嘅第二年，為動作明星老公布斯韋利士懷孕，大住肚嘅佢仲為雜誌封面拍裸照，雖然三點不露，但係破格嘅舉動令影迷感到相當震撼。再到第二年，狄美又有新裸照出現，今次佢回復美態，以全裸姿態再塗上人體彩繪挑逗大家嘅視覺神經，呢個時候大家正正式式欣賞到狄美一副豐滿婀娜嘅激凸胴體。唔知係咪剝開有鋪癮，拍攝《不道德的交易》狄美已經轉型作性感演出，後來拍《脫衣舞孃》更加剝到三點盡露，更以極盡挑逗嘅脫衣舞展示豪放一面。之不過，狄美嘅瞓身演出雖然得到觀眾注目，但由於作品劇情不濟，令她被選為1996年美國金草莓獎嘅最差女主角。之後，狄美為求翻身，演出《伴我雄心》嘅時候不惜剃光頭，可惜再次為狄美帶來1997年美國金草莓獎嘅最差女主角「殊榮」。雖然，狄美嘅電影得唔到大家認同，但係其火辣身材依然長留於大家嘅心中。
撰文：賢