澳門Style：蝦仁炒西蘭花

要睇一個廚師有冇料到，睇佢嘅炒菜就知道，好似我最喜歡食「蝦仁炒西蘭花」。大家都知，蝦仁快熟，但西蘭花就十分難熟，如果事先灼熟咗啲西蘭花，當有客人點菜時再回鑊快炒，出嚟口感會大打折扣，加上其中主要調配嘅蒜蓉，炒得太耐就會冇晒蒜香，要三者配合得啱啱好，大廚嘅功力真係要有番咁上下。前兩日上澳門大富豪桑拿，揼完骨攤喺大廳度睇電視，突然聞到一陣蒜香，回頭一望原來有人點咗碟「蝦仁炒西蘭花」，睇佢食西蘭花時「嗦嗦」聲，估計係即時炒熟，而且火候啱啱好，於是食指大動，即時點咗一個，果然冇令我失望，火候控制啱啱好，而且選用嘅蝦仁大大隻，食落爽滑彈牙，配埋蒜香，絕對係完美配搭，至於西蘭花配埋蒜蓉芡汁，愈食愈有味道，令人驚喜，絕對值得推薦。