家陣形容上圍激凸嘅女性，會稱佢為巨乳女。喺「巨乳」未被普及運用嘅時候，我哋會稱佢做波霸，而波霸喺好多大中華地區人士心目中，亦係經典艷星葉子楣嘅代名詞！楣姐除咗上圍勁，影響力亦相當強勁！
葉子楣係活躍於八十年代中至九十年代中嘅經典艷星，佢出身於亞視第三期訓練班，曾經拍過唔少電視劇。不過，佢拍電視劇就冇乜成績可言，之但係拍電影就漸漸爭取到極大人氣喇！楣姐佢喺電影當中成日賣弄身材，由於當時冇乜艷星，加上佢嘅巨胸又真係好巨，故此惹得萬千男士為之傾慕，楣姐亦因此被稱為波霸。楣姐佢亦好識得創造話題，出席公開場合嘅時候經常刻意半露酥胸，令佢成為全場焦點！至於佢嘅胸圍尺寸到家陣仲係一個謎，有人話係36F，亦有人話有38F，但係由於楣姐冇公開過亦冇畀任何人量度過，所以一直都冇人知。
為楣姐嘅演藝生涯更添傳奇同神秘感嘅地方除咗胸圍尺寸，仲有佢堅持三點不露！雖然楣姐拍過好多艷情片，但係最大嘅露出鏡頭都只係裸背同露臀，佢曾經表示過寶貴嘅三點只係留畀老公欣賞喎。由於楣姐愈唔想露就愈引得大家心癢癢，所以曾經有片商出到八百萬港紙要求裸露上半身，然而楣姐都係婉拒咗。為咗保護呢對搵食架生，楣姐更特別為巨胸買保險。經典艷情片男星，即係我偶像曹查理就講過，葉子楣好醒目，好識得用自己嘅身材製造話題，但係佢只會賣弄身材而唔會剝衫，因為佢個胸係假嘅。
係真定係假都好，楣姐的確為香港嘅電影艷情片歷史寫下光輝一頁，而佢最為人津津樂道嘅作品就係《玉蒲團之偷情寶鑑》。片中佢淫到出汁嘅演出令人印象深刻，同徐錦江嘅一幕水桶中大戰更被稱為經典，更加被風俗界引用為奉客招數。楣姐對民間嘅影響力仲有食品，八十年代尾，有台灣嘅小食店主有感於楣姐呢位波霸太紅，於是就將現時大家都常飲嘅珍珠奶茶改名為波霸奶茶，後來有台灣人移民到北美地區並將波霸奶茶引進，令當地人稱呼一粒粒嘅珍珠粉團為「波霸」。
撰文：賢