點解近年識飲識食嘅「巴打」都鍾意過馬交呢？無他嘅，Event多，玩得Free，人多女最多，而最緊要係夠特色，好似起晒朵嘅Sky 21早就佔盡地利，仲要喺21樓半露天，環顧全澳靚爆夜景，要飲酒第一時間諗起佢啦！
呢個場Event真係多到爆兼國際性，繼歐美日泰世界級DJ去過現場輪流打碟後，早前又大玩「韓風」，請咗人氣艷女Dj Siera Lee捽韓式House Music，蒲友都未消化，聖誕又到喇，今次主題先冷後熱，主題玩浪漫：「與你至愛歡度平安夜」，以為好碎料，原來係食完平安夜晚餐之後再全場倒數迎聖誕！「面書」有3款聖誕餐單選擇，兼有香檳飲。細佬（目及）過Menu食材唔曳，但講到尾食只係前戲，跟住落嚟多位國際DJ喪捽搞旺氣氛，聽聞為慶祝開業兩周年仲有神秘表演嘉賓及抽獎，又食又拎，爽喎！
撰文：祖