日前深圳某大廣場門口，雲集咗近五百個大肚婆，身穿劃一紫色汗衫，各自坐喺自己嘅蓆子上面閉目養神，啲途人都唔知乜嘢事，之後有人宣布活動開始，跟住見到五百個大肚婆齊齊玩瑜伽，個個有板有眼，睇嚟都操咗一排至上場，事後發現原來係某大奶粉商同瑜伽組織合作，搞咗個孕婦瑜伽活動，主題係倡導自然分娩，同時希望打破孕婦集體玩瑜伽嘅世界紀錄。而據大會負責人講，原本有千三名學員報名，但由於場地有限，所以至搵五百個精英出席，難怪個個玩得頭頭是道。其中有啲腹大便便嘅準媽媽，仲露出大肚皮，畫上可愛嘅卡通人物，希望小朋友同卡通主角一樣精靈可愛，認真用心良苦。