早前三色台晚上有個節目，講三個上咗年紀嘅藝人齊齊去旅行，手法相當新鮮，而佢哋三個雖然年紀大，但係就愈老愈可愛，某程度上演出仲有趣同生猛過好多後生仔添！至於點樣可以學到佢哋咁活潑呢？睇情色電影《禁慾》大可以了解一二。
《禁》片講述50歲嘅大衞係一名藝術學院教授，佢雖然老到冇頭髮又成額都係火車軌，但係其藝術涵養豐富，兼且博學多才，繪畫、彈琴、攝影無一不精，加上滄桑而成熟嘅男人味，迷倒一班女學生。而大衞人老心不老，為咗保持身體機能活躍，除咗有一個年紀相若嘅床伴卡洛琳，亦同朋友喬治四圍溝女玩一夜情。當然，大衞咁做除咗滿足需要，仲因為佢一直自覺年紀漸大，漸漸失去活力，好想同後生女一齊證明自己仲有魅力，仲有青春。後來，大衞就結識到一名叫做康蘇拉（彭妮露告絲飾演）嘅20歲女學生。康蘇拉氣質驚人，五官標致，舉手投足都散發出攝人魅力，深深吸引着大衞，二人好快就變成一對戀人。大衞漸漸發現，康蘇拉對自己嘅愛極之簡單同率真，絕對唔同其他女仔咁為咗金錢、成績而投懷送抱。
康蘇拉咁單純嘅愛情觀令大衞不禁心驚，除咗因為佢對愛情幾十年來都係玩玩吓，加上自己年紀好快就失去雄風同魅力，而且仲一定快過康蘇拉去世，但係大衞此時此刻對康蘇拉嘅愛已經泥足深陷。某日，大衞嘅好友喬治突然離世，令大衞傷心之餘亦感到其人生亦即將步入尾聲。與此同時，床伴卡洛琳發現大衞同康蘇拉嘅關係因而大發雷霆，仲拂袖而去，令大衞傷上加傷。然而，康蘇拉卻對佢加以安慰，可惜愈拉近大家嘅距離，就愈令大衞想逃避，到康蘇拉畢業嘅時候，大衞更加唔參加其畢業聚餐，令康蘇拉傷心離開。兩年之後，大衞重遇康蘇拉，卻驚見以前美麗動人嘅康蘇拉變得毫無生氣，好似老咗三十年一樣嘅蒼老婦人，但係大衞呢個時候卻發現自己真正愛上因為患重病而變成咁樣嘅康蘇拉。
本作同《一樹梨花壓海棠》一樣都係講老牛食嫩草，但係拍攝手法更加深入，剖析中年男人對愛情以及人生觀，可能令好多中佬大有同感。本片床戲刺激度足夠又夠順暢，而同超級索女彭妮露告絲嘅床戲則慢而細緻，當見到其豐滿婀娜嘅胴體於床上慢慢蠕動，興奮油然而生。
撰文：賢