近年內地職業籃球賽引入不少外國制度，令比賽更具可觀性，吸引了不少球迷嘅目光，但粉絲們除咗關注偶像球星嘅演出之外，有唔少朋友仲會留意樣子甜美，身材出眾，渾身上下都充滿活力嘅啦啦隊成員！
有睇開內地籃球比賽嘅朋友都了解，每隊球隊家陣都有自己嘅啦啦隊，成員全都是漂亮嘅年輕姑娘，佢哋除咗要人靚身材好之外，仲要渾身是勁，因為比賽中途或者休息時間，佢哋就會走出嚟以勁歌熱舞嚟替自己所屬球隊打氣。以前呢啲啦啦隊成員，大多數都係兼職，因為每周只有一場半場比賽，佢哋只需返一日工，就算隨隊出發去外省比賽，亦會安排即日來回，所以球隊唔會全職請佢哋，但近年比賽次數多咗，而且商業贊助亦多咗，單靠十幾個大漢好難吸引市民大眾嘅目光，所以家陣啦啦隊都行全職制，每天隨隊練習同出席活動，有囡囡蹦蹦跳跳，確實吸引好多！
除咗參與商業活動之外，球隊亦會喺比賽前，叫班囡囡喺球場門外或者喺人多嘅地方，露兩手啦啦隊舞技，再拉吉祥物出嚟做吓宣傳，據講真係可以吸引不少生客入場。另外，中央電視台亦十分合作，佢哋每年都會搞一個啦啦隊比賽，而參與嘅都係以籃球界嘅啦啦隊為主，打入五強嘅啦啦隊，連球隊都知名度提升，所以呢個節目可以話幫球隊造勢，而且亦令啦啦隊嘅成員明星化，所以家陣啦啦隊亦有不少粉絲，亦因為如此，啦啦隊嘅招募就更趨嚴格，除咗人要靚，身材要好，仲要有氣有力，因為每次演出都要勁跳四、五分鐘，真係少啲體力都唔得，所以呢行唔係人人都做得o架！
撰文：小德