體壇明星人氣高，自然惹來傳媒追訪，同時經常畀人挖出艷史，好似有「日本棒球金童」之稱嘅達比修有就多次傳出佢同AV女優交往，最近更傳佢同好友田中將大爭女而反目添！
兄弟是用來講義氣的，之但係，一講到溝女，就連兄弟都冇情講囉！話說最近日本體壇廣受熱烈討論嘅，並唔係日本成功申辦2020奧運，而係効力日本棒球聯賽隊伍東北樂天金鷹、今年25歲嘅王牌投手田中將大同巨乳AV女優成瀨心美嘅緋聞！早前有傳媒發現將大喺微博發表玩電子遊戲《實況Powerful棒球2013》嘅心得，然後心美就不斷留言交流，兩人以打機傳情的消息傳得熱烘烘。
成瀨心美現正處於休養，因無所事事而成日掛住打機唔出奇，至於佢點解要同將大交流打機心得呢？有人估計心美一係想溝呢位前途一片光明嘅棒球運動員，希望他朝嫁人唔使再拍AV，一係就想借將大嚟製造話題，谷起自己嘅人氣，為復出造勢。日本嘅狗仔隊立即跟蹤將大作突擊訪問，將大就好淡定咁話佢同心美只係網友，兩人冇見過面。當問到佢對AV熟唔熟，將大表示冇乜點睇過，仲話：「我又唔係達比修有。」好明顯係寸師兄達比修有經常同AV女優傳緋聞啦，例如明日花綺羅同橫山美雪。之後，狗仔隊去搵達比修有，問佢點睇將大同心美嘅緋聞，佢憤憤不平咁話：「將大太自大喇！」跟住又話同將大絕交！於是就傳出兩人為咗爭奪成瀨心美而反目。後來將大向傳媒表示，佢同達比修有親如兄弟，慣咗開大家玩笑，呢件事絕對唔會影響到佢哋兩兄弟嘅感情喎！
撰文：賢