擁有大學學位嘅模特兒一啲都唔出奇，但擁有大學講師資格嘅，就認真少有，而今日要介紹嘅南韓名模具智星，佢除咗係炙手可熱嘅模特兒外，仲係首爾藝術專業大學廣播演藝學院嘅講師，認真巴閉！
1983年出生嘅具智星，出道超過十年，目前係南韓最火紅嘅藝人，除咗拍寫真，做車模外，仲染指電視劇同出唱片，可以話十八般武藝樣樣精通，踏入30歲嘅智星，咪以為佢會人老色衰，反而更趨成熟，魅力驚人。雖然智星出道多年，但初出道幾年都係人云亦云，跟住朋友走南闖北，有一日工就做一日，冇乜理想同大志，事關當年智星「嬰兒胖」十分嚴重，塊面成個包咁樣，直至25歲時，智星見唔可以再不思進取，於是積極瘦身，磨練演技，仲學埋唱歌，經一番努力後，終於冒起頭嚟，分別喺07、09同10年奪得多個車模大獎，被網友喻為南韓十大人氣車模之一。
講番做講師，原來早喺08年，智星就擔任非常汽車大學賽車模特兒專業嘅講師，到10年就做埋首爾藝術專業大學廣播演藝學院模特兒專業嘅講師，認真唔講得笑，證明佢多年來嘅努力，一啲都冇白費，而且得到很高嘅認同，雖然智星咁紅，但平時好低調，一啲緋聞都冇，有記者問佢點解咁低調？佢話只想做好自己嘅工作，受到支持者嘅肯定就夠啦！近年智星仲做埋網絡遊戲嘅代言人，令佢人氣大增，連內地嘅網友都識得佢，四出搜羅智星嘅照片，所以佢嘅貼圖區多如繁星。有人問佢有冇打算嚟大中華區發展，佢表示好想，但經驗仲要時間磨練，講師都咁謙，唔服佢都唔得！
簡介：具智星拍攝過不少寫真照片，而以下網站就收錄咗大部分，見證咗智星多年嚟嘅努力同成長，粉絲們不妨瀏覽一下！
網址：http://myfavorites.jonai.net/Korean/Gu_Ji-Sung/index.html
出生地：南韓
三圍：35D-24-35
身高：173cm
撰文：龍四海