螺螄妹天使

廣西有種美食叫做螺螄粉，喺當地十分出名，屬於粉麵美食嘅代表，等同成都擔擔麵、四川酸辣粉、山西刀削麵等，早前佢哋為咗推廣呢款美食，喺柳州搞咗場大型嘅推廣活動「螺螄妹形象天使選拔賽」，搵嚟十幾二十個美少女，喺舞台上插科打諢，鬥唱鬥跳，最後選出冠亞季軍，仲搞咗個簡單而隆重嘅頒獎儀式添。連一碗簡單嘅螺螄粉都有代言天使，有網友就話廣東以粉麵小吃聞名，將來一定成為天使大省，好似乜嘢牛腩天使、雲吞天使、魚皮天使等，真係數都數唔晒，到時一街都係天使，你都咪話唔威！