九十年代位於家陣十六浦酒店附近嘅海邊，有一艘古式古香嘅「皇宮娛樂場」，樣子似香港啲海鮮舫，但最為人認識嘅名字，就叫做「賊船」，事關賭仔上到去十賭九輸，好似上咗賊船咁樣畀人洗劫一空，而「賊船」嘅前身就係珠江畫舫。五六十年代，澳門十六浦碼頭附近有好多花舫，供客人上去食飯聽曲、納涼賞月，甚至提供埋性服務，而當時啲花舫各有名稱，好似「紫洞艇」、「秋月艇」等，名字十分典雅，客人可以單拖上船，亦可以三五成群赴宴，上到去客人可以隨意點餐、點曲，甚至點埋囡囡都冇問題，船上嘅雜工一聽「柯打」，就會為客人張羅，而當其時冇手提電話，點樣聯絡呢？原來就係用點燈，當花舫嘅船尾點上燈籠，就代表有客人到，而掛上不同顏色嘅燈籠時，就代表有不同嘅需要，例如想搵小姐係紅燈、搵樂師係紫燈等，喺附近搵食嘅小船，就會憑燈嘅顏色撐過嚟做生意。