日本AV界有一段時間興起一個系列叫做《團地妻》，講述入住高級公寓當中嘅中產人妻因為深閨寂寞，加上老公滿足唔到自己嘅慾求，於是就趁老公返工嘅時候勾引隔籬屋嘅男人或者公寓保安。其實呢條橋一啲都唔新鮮，六十年代就已經有法國情色片用咗，呢部就係《白日美人》喇！
六十年代電影界嘅尺度未係咁寬鬆，所以好少有露點鏡頭，就算打正旗號係情色電影亦唔例外，之不過冇露點一樣可以靠大膽意識搭夠，有時仲分分鐘刺激過三點盡露嘅作品添！《白日美人》就係最佳例子喇。《白》片故事講述美艷動人、高雅又有韻味嘅塞維莉娜係一名人妻，佢一直深愛職業係外科醫生嘅老公。由於老公搵到錢，所以塞維莉娜可以話係一個生活無憂嘅人。然而，莉娜卻有無限哀愁，皆因老公性能力不足以滿足佢，加上工作繁忙，鮮有時間同莉娜相處，並且，莉娜原來有特殊癖好，鍾意男人對佢虐待同欺凌至得到快慰。為咗滿足自己嘅性慾，莉娜決定喺老公返工嘅時候，去到一間妓院做妓女。由於莉娜只喺日頭出現，所以就被妓院同嫖客稱為白日美人。
莉娜做妓女嘅時候，接過好多特別嘅客人，其中一個叫做馬賽爾嘅更係職業殺手。某日，莉娜賣淫嘅事畀老公嘅朋友知道，一直都好想將莉娜據為己有嘅馬賽爾就設計暗殺此人，點知誤中副車，令莉娜嘅老公中槍癱瘓。莉娜見此內疚不已，於是將一切告知老公，點知老公卻突然從輪椅企起身，仲同莉娜重修舊好，到底呢一切係真實定係幻想呢？故事將一個人妻嘅內心寂寞，對性嘅渴望同忌諱一一表達，故事發展期間仲穿插咗好多有關女主角嘅童年往事，每段都帶有唔少性暗示，為觀眾嘅道德觀念帶來衝擊，將回憶拍得如幻似真嘅手法更帶來無限遐想。另外，女主角凱瑟琳德納芙雖然冇露點，但係性感豐滿嘅身材依然吸引，加上有裸背及露波邊鏡頭，充滿獸性嘅呻吟同極盡淫靡嘅表情，相信一心睇肉嘅朋友應該冇投訴。
撰文：賢