上個月14日喺美國紐約時代廣場，進行街頭人體裸繪表演嘅藝術家Andy Golub，啱啱先至搞出個大頭佛，連同兩位表演嘅女裸模一齊畀警察拉咗，話佢哋影響公共秩序及行為不檢。呢頭佢又趁住紐約時裝周，喺著名時裝品牌嘅展場外，照辦煮碗再搞街頭人體裸繪，而有咗上次廣泛報道後，Andy呢次演出更為哄動。事關佢呢次搵嚟男女老幼、燕瘦環肥嘅模特兒全裸上陣，配合佢色彩繽紛嘅繪圖，極具視覺效果之餘，圍觀群眾更係相當多。Andy表示街頭裸繪目的係為咗展現藝術性，正好脗合時裝展嘅藝術氣氛，而佢亦相當感謝模特兒參與。當然，佢最好彩嘅地方就係今次冇畀人拉囉！