內衣示人有價

最近廣州北京道街頭，天未光就出現近百位只着內衣的青年男女，天氣雖然仲係好熱，但都唔使着成咁呀？街坊一問之下，原來有個年輕人嘅時裝品牌店開張，為咗吸引人流同打響頭炮，當日凡着內衣褲到場嘅頭五十位顧客，可以免費選擇場內牛仔褲一條，消息一傳出即吸引咗近百人到場，五十條牛仔褲轉眼搶晒。其實呢種宣傳活動，喺外國周時見到，但今次內地學得都唔錯，事關嚟嘅都係年輕男女，養眼程度攞滿分。