日前講到澳門有兩個四面佛，一個喺氹仔嘅馬路中心，而喺澳門碼頭近回力球場嘅一個，竟喺大廈內供奉，點解會咁？由於氹仔太遠，交通唔方便，所以唔係咁多本地人去，而且當時經常拜四面佛嘅都係嚟自泰國嘅打工囡囡，唔少都喺夜場工作，佢哋瞓醒都太陽落山，仲趕去氹仔，邊有時間返工，於是因利乘便，就喺碼頭附近供奉一個方便善信參拜，由於喺大廈內，唔使日曬雨淋，啱晒啲囡囡，加上廿四小時開放，所以曾經盛極一時。據講向四面佛許願，如果事成就要還願，聞說不少善信答允喺佛像前跳脫衣舞，坊間流傳試過好幾次，廟祝因應要求便會圍起圍板，等善信還願，所以早年你會見到大堂內會有幾塊活動圍板，據講就係有咁嘅用途。