好多新星初出道時都頭銜多多，今日介紹嘅新進歌手裴紫綺亦唔例外，由於佢個子小小，一臉日系打扮，喺2010年出道時就被網友喻為內地版「小濱崎步」，由於樣子清純，亦有人稱佢為「氧氣少女」添！
嚟自河南嘅裴紫綺，十零歲就去北京讀書，之後考入北京外語大學，佢話想學多啲外語，可以聽多啲唔同國家嘅歌曲及音樂，可見佢對音樂幾咁熱衷。紫綺樣子清純，被經理人公司睇中，簽佢做藝人，而第一項工作就係當MV模特兒，由於紫綺表現突出，所以人氣急升，之後知道她想喺樂壇發展，公司喺2011年先為佢推出個人大碟《大不了》試試水溫，點知畀佢一碟風行，第二年再推出個人大碟《萌葯》，其中有首歌《嗒呤Darling》放咗喺網上短短幾日，點擊率就已經幾百萬，可見佢受歡迎程度，舊年亞洲巨星演唱會更與張惠妹同台演出添！
紫綺除咗唱歌出色外，偶爾都會做吓代言或者拍吓廣告，而近年興起嘅網絡遊戲，佢亦不甘後人，做咗兩個遊戲嘅代言人，令佢嘅健康形象，深入年輕群體當中，頭銜多到不得了，但佢都唔係咁喜歡，反而有媒體稱佢為「環保大使」，佢竟欣然接受。紫綺喺一次訪問中表示：「讓地球多一份平安，少一點災難。」仲話希望以微薄的力量貢獻環保，相信佢嘅粉絲亦會支持，齊齊加入環保戰士行列。
簡介：呢個係裴紫綺嘅私人微博，裏面收錄好多佢嘅自拍照同工作照，當然寫真一定唔會少，想更深入了解紫綺，呢個微博絕對係你最佳嘅選擇。
網址：http://weibo.com/peiziqi
出生地：河南新鄉
三圍：32-22-32
身高：163cm
撰文：龍四海