師傅教落，娶妻求淑女，不過我覺得仲差少少，除咗賢良淑德，曉得處理一切家務瑣事之餘，仲要忠心向夫至得，咁樣老公至可以安心出外拚搏。好似道重紗由美識得從一而終嘅美少女，搵嚟做老婆就最好喇！
家陣日本藝能界嘅女子組合就以AKB48獨佔鰲頭，其人氣之強勁，連內地、台灣、香港嘅民眾都知道，氣勢果真一時無兩。不過，AKB48喺亞洲地區嘅認知程度，相對於另一個美少女組合可能仲係差少少，邊個組合咁勁呀？咪就係俗稱魔靈娘嘅早安少女組囉！雖然，早安少女組最活躍嘅時間已經過去，但係想當年真係紅透半邊天，好多亞洲人都聽過佢哋個名。呢個歷史超過十年嘅組合到現時依然未解散，其成員亦一樣極具質素，道重紗由美就係最佳例子喇。今年24歲嘅紗由美2003年出道成為魔靈娘，當時嘅佢真係可愛到震，曾經被人稱佢擁有神級嘅可愛程度，過咗咁多年亦可愛不減，仲多咗幾分清秀綺麗氣質添。身材方面，紗由美纖巧苗條，加上皮白肉嫩，上圍係細咗少少，但係身上散發嘅青春活力依然博得高分數。
紗由美喺2002年參加早安少女組嘅選拔活動，同龜井繪里、田中玲一齊從一萬四千名參賽者中脫穎而出，成為魔靈娘其中一員。加入魔靈娘成為第四代成員之後，紗由美開始活躍起嚟，更加一度登上紅白大賽舞台，當時阿妹只係得14歲，同隊友田中玲成為紅白大賽史上首名出生於平成年嘅演出者。呢幾年來，阿妹演出範圍甚廣，舞台劇、電視劇、電影，亦有以歌手身份出席不同活動同綜藝節目。上年，更加同田中玲一齊主演電視劇《數學女子學園》，仲接任為魔靈娘第八代隊長。紗由美曾經多次表示，自己細細個就已經夢想成為魔靈娘，仲話比起戀愛，為組合盡心盡力先係最優先要考慮嘅事情，更補充話魔靈娘正式解散佢先會脫離組合，願意為組合搏到最後一刻，從一而終嘅女仔現世代真係少見，做老婆一流呀！
道重紗由美成為早安少女組第八代隊長之後，工作雖然繁忙，但係亦不忙吃喝玩樂，想知阿妹最近又喺邊處歎世界，就要留意佢個Blog喇。
網址：http://gree,jp/michishige_saymi/
年齡：24歲
身高：5呎3吋
三圍：32-23-33
撰文:賢