談到澳門嘅泰式浴室喺八十年代湧現，唔可以唔講埋隨之而來嘅文化影響，例如當時就多咗好多大大小小嘅泰式餐廳，有不少係豪裝食肆，但亦有不少係街邊小攤，明顯豪華餐廳係開嚟畀遊客捧場，而街邊小攤就係供應畀嚟澳門搵食嘅泰妹。記得當年荷蘭園一帶最多泰國餐廳，亦因為最早期嘅泰式浴室就開喺附近，因利乘便，客人沖完涼就可以歎埋泰國菜。到咗今時今日，荷蘭園仲有四五間泰國餐廳喺度，但唔講唔知，如果你同泰國囡囡出去食飯，佢哋係唔會去餐廳食嘢，事關為咗就港澳人士，搞到口味完全唔同，啲囡囡情願去街邊小攤買飯餸嚟食，價錢平之餘，更食得津津有味。除咗飲食文化，傳統宗教文化亦進入澳門，大家最為熟悉嘅就係四面佛。大家記得嘅話，澳門有兩個最出名嘅四面佛，一個係氹仔馬場對開嘅馬路中心，另一個就係港澳碼頭旁住宅大廈裏面嘅四面佛，而後者更係夜場囡囡至愛。點解？下期話你知。