一年一度嘅「國際無上裝日」喺8月最後一個周日舉行，據報道今年有近四十個城市參與，主要集中於美國，如華盛頓、紐約、加州等，幾百人上街，抗議裸胸權利方面男女不平等。
話說呢個活動已經舉辦咗六年，話明係「無上裝日」，參加者無論男女都會裸胸示人。於美國主要城市，參加者大多數都係年輕美女，個個裸胸爭取權利。事關目前美國好多個州嘅法律，都係禁止女性喺大街大巷裸胸示人，如果警方見到囡囡乜都唔着坦蕩蕩咁行街，一定會出面阻止，之後按各州唔同嘅法律，例如行為不檢、公眾地方不雅、擾亂公安等罪名檢控，總之實有條罪入到你。婦女組織早就覺得條例歧視，所以積極爭取多年，希望裸胸權利男女平等。
除婦解組織喺度大聲疾呼，近年支持者突然倍增，事關歐美國家對母乳餵哺重視，好多媽媽都用母乳嚟餵哺孩子，但母親們喺公眾地方餵哺小朋友時，不時受到不必要嘅阻攔，所以一眾支持餵哺母乳嘅家長同埋支持者，都參與遊行，事關當女性可以裸胸上街，咁樣餵哺母乳自然不成問題，據講仲收集簽名向總統反映，要求修改相關法例。
撰文：小德