近年內地嘅相親節目不知幾火爆，打開電視，差唔多日日都有得睇。呢個風潮，除咗喺傳媒中廣泛流傳外，近年更傳到去商場裏面，好似北京某大商場，日前就搞咗個相親活動，吸引過百人圍觀，佢哋抽出多對男女，即時進行遊戲，考考佢哋嘅默契同埋反應，最後就好似電視節目咁，要男女互相點評，看看最終是否一見鍾情。而速配成功嘅朋友，就可獲得商場送出嘅大獎。網友話除咗北京，全國好多商場都會搞相親活動，美其名替男女撮合姻緣，但參加嘅朋友，大家都三唔識七，根本唔會因一場遊戲就產生情愫，佢哋能夠走埋只係想贏得獎品，所以呢啲活動除咗噱頭同利益外，根本乜嘢愛情成分都冇，大家對呢啲活動更唔使咁認真！