日本秋葉原購物街，相信港人一定唔會陌生，每年8月嘅暑假就會舉辦一年一度嘅「潑水節」，佢哋同泰國嘅潑水節好唔同，只會將啲水潑落地下，仲要係附近上班嘅囡囡，着上女僕裝至可以玩。
今年係第十年舉辦「潑水節」，仲同台灣合辦，即係同時間喺台灣亦有同類活動。為咗隆重其事，所有參加嘅「潑水女郎」，都要事前報名，唔係你話嚟玩就玩得，所以囡囡嘅樣子、身材、年紀都有一定標準。喺8月3日舉行開幕式，五十多名身穿女僕裝嘅女郎齊集秋葉原齊齊潑水，據警方估計，當日吸引咗五百幾人嚟圍觀，而呢個活動會一直到本月19日，期間除咗女僕裝外，囡囡仲會喺8月13日開始，以七夕浴衣示人，即係好薄嗰隻和服。青春美少女着上浴衣，真係好吸引，相信呢段日子秋葉原嘅街頭，一定逼滿人。
呢個「潑水節」傳統，其實係夏天熱到飛起，好多商戶都會喺門前灑水替街道降溫，而秋葉原有好多女僕咖啡店，每日喺最熱嘅時候，女僕就會出嚟灑水，由於人數不少，蔚為奇觀，吸引不少遊人留步，商戶見呢招有用，決定將傳統變為節日，仲大搞起嚟，而影音店或者時裝店都可派員參加，但一定要着上女僕裝，搞到成條街都係女僕，真係諗起都夠晒壯觀。
撰文：小德