近年內地嘅八九十後年輕人，好多都一個人住，於是興起飼養寵物嚟作伴，最受歡迎嘅首推各類狗狗，而主人視狗狗為自己嘅囝囝囡囡，當佢哋要結婚嘅時候，就會搵埋寵物當伴郎伴娘，一同見證人生最重要一刻，但如果狗狗冇經過訓練去到呢啲大場面，十隻有九隻都會失控，四處亂跑或者亂吠，你話新郎新娘喺註冊途中要跑嚟跑去捉番自己嘅狗狗，都咪話唔失禮。有寵物店就提供婚禮訓練班，等狗狗出席大騷時唔會亂嚟，仲要有狗狗保母同行，萬一有乜事都有專人照顧。咪以為只有新郎新娘嘅狗狗至需要，原來主人設宴，人狗同樂，賓客嘅狗狗同樣未見過大場面，亦都需要相關訓練。