香港嘅麻雀文化相當普及，唔單只係媽媽級同婆婆級人士鍾意打幾圈，好多廿零歲嘅女仔亦一樣牌藝出眾，而且數口特佳，計麻雀數唔使用計數機。日本人對於打麻雀嘅熱愛程度亦拍得住香港人，同樣亦有好多年輕人參與，水着妹由井香織就係最叻計麻雀數喇！
日本普遍嘅水着粉絲雖然都鍾意欣賞巨乳，但係一旦要佢哋評分或投票，得到最多人支持嘅水着妹往往唔係巨乳尤物，而係身材標準勻稱嘅美人兒，就好似山本梓、小松彩夏咁。而提到投票選舉，日本Miss雜誌舉辦嘅「Miss Young」亦係相當具代表性嘅活動，亦為大家帶來好多水着新血，由井香織就係其中一位。24歲嘅香織樣子和藹可親，予人一種完全無壓力嘅舒適感，同時亦不失可愛俏麗，相當得人鍾意。身材方面，香織嘅肌膚唔算雪咁白，但係睇落健康又鮮嫩，個子唔算高，33-23-32嘅三圍曲線明顯，彈性美乳、纖腰、圓潤臀部應有盡有，係就係唔算突出，不過就唔似得其他爆乳女優咁，身細細胸大大，成個人充滿突兀感覺。
香織2010年出道，當時佢唔係以拍水着寫真維生，而係舞台演出團體「Match Pump」嘅第一代成員。據聞，香織除咗跳舞出色，其演技仲相當好，往往能夠用活潑又生動嘅方式將角色演活，演技深得團隊認同。後來，香織離開劇團同藝能事務所簽約為雜誌模特兒，之不過由於大家合約上有分歧，一年之後搵到第二間事務所簽約再發展。是是非非過去之後，香織參加2012年Miss Young選美活動，憑俏麗笑容以及勻稱身材而勇奪冠軍，今年仲成為賽車女郎團隊「DIXCEL Racequeen」成員，幾乎有賽車嘅地方都見到阿妹嘅身影。香織除咗與車有緣，同麻雀亦有緣分。香織自認本身鍾意打麻雀，最叻就係計麻雀數，所以2011年阿妹就被邀請為「麻將最強戰2011 笑嘻嘻地直接播送」嘅現場記者，一邊報道戰況一邊幫參賽者計數。另外，阿妹亦試過喺Sky TV嘅麻雀節目「混合麻將聯盟 Gachi麻雀」亮相打番幾圈添。
撰文：賢