對歷史熟悉嘅朋友都知道，清代八旗之一嘅正黃旗人才輩出，好多都係王親國戚。今日要介紹嚟自吉林嘅靚女賈明瑛，正係正黃旗嘅後人，有網友就叫佢做小瑛格格。
賈明瑛係咪有王族血統，咁真係問佢至知，但佢外形典雅，成個古典美人就係不爭嘅事實。佢畢業喺中國音樂學院，一手古箏更係彈得出神入化，除咗古箏，佢跳舞都好掂，大家實以為佢一定係學民族舞啦？咁就大錯特錯，明瑛學嘅係拉丁舞同埋現代舞。由於日子有功，要佢演繹性感角色，可以話毫無難度，所以08年畢業後，就以婉約典雅同性感奔放兩種極端造型，殺入模特兒界，2010年更參加第五屆平面模特兒大賽，勇奪北京賽區冠軍，實力真係唔講得笑。之後事業一帆風順，除咗拍平面硬照外，仲開始染指影視圈，但由於欠缺經驗，所以呢段時間都算幾辛苦。
明瑛運氣好，接嘅雖然係小角色，但就能拍到大型製作，好似電視劇就入到《新版紅樓夢》嘅劇組，而電影更參與《建黨偉業》、《非誠勿擾》嘅演出，喺呢段期間明瑛可以從好多大導同巨星身上學習，令佢演技火速提升，所以佢今年磨拳擦掌，希望可以喺影視工作上一展抱負，接一啲重要角色嚟做。相信以明瑛嘅努力同條件，一定可以如願以償，但依家都係多接硬照工作好啲，因為天生衣架子嘅明瑛唔做模特兒，絕對替業界可惜，特別係佢拍嘅性感寫真，不知令幾多粉絲着迷。
出生地：吉林
三 圍：35-23-35
身 高：165cm
撰文：龍四海