好多靚女模特兒接拍影視作品時，都要考慮角色問題，就算小角色都好，但千祈咪做反派。不過嚟自安徽嘅甘婷婷，佢就係由做反派開始廣為人認識，而最家喻戶曉嘅，就係新版《水滸傳》中擔任潘金蓮一角。
婷婷原先係讀投資證券專業，畢業後諗住去金融機構打工，但有次喺上海被人邀去拍廣告，令佢無意中入咗模特兒界，由於婷婷樣子清秀，個子高挑，喺模特兒界漸漸走紅，之後就有人邀佢拍劇，於是膽粗粗去做，自此名氣更大，但相反婷婷嘅模特兒事業竟停滯不前，於是把心一橫，由上海轉戰北京，但佢冇直接去劇組自薦，反而考入中央戲劇學院表演系進修演技，經過一番磨練後，演技大躍進，於是四出找尋機會，咁啱有部劇需要一個反派，婷婷毅然答應，劇組當然唔會你話做就畀你做，經過連番試戲，發覺婷婷最合適，自此踏上反派之路。
第一部反派戲份之後，婷婷連拍多部影視作品，經驗得到進一步提升，之後更被新版《水滸傳》劇組邀約，起初經理人都問佢做潘金蓮呢個反派角色會唔會擔心受到影響，婷婷話一啲都唔擔心，反而覺得係一個好好嘅機會。果然，婷婷就藉呢個角色人氣急升，之後幾次亦由反派轉為正派，更由小配角搖身一變為女主角添。亦由於佢成為當紅炸子雞，所以模特兒工作就接少咗好多，大家喺網上睇到嘅噴血寫真，好多都係往年作品，希望婷婷努力做演員嘅同時，都唔好忘記影多啲性感寫真，等粉絲們可以一邊欣賞，一邊支持嘛！
簡介：在甘婷婷嘅官方微博上，收藏咗好多精彩寫真，由於近年紅咗，少拍咗性感照片，要睇好嘢，就要翻去之前幾頁會多啲。
網址：http://blog.sina.com.cn/gantingting
出生地：安徽蕪湖
三圍：33-25-34
身高：165cm
撰文：龍四海