喺氣溫咁高而太陽又咁猛嘅炎夏，最好嘅消暑節目係乜嘢？相信非去海灘莫屬，尤其對天體愛好者嚟講。英國早前就有旅遊網站，選出3個全英最好嘅天體泳灘，更為天體愛好者計劃埋路線，等好此道者能順便裸遊全英國，唔知大家有冇興趣呢？
位於英國東南部嘅Brighton East Beach，不但南臨英倫海峽，更係英國最著名兼攞正牌嘅天體海灘，因此每年夏季都吸引眾多天體愛好者到臨裸曬。由於Brighton East Beach係個綿延又細沙嘅海灘關係，除咗享受日光浴，仲可以喺度踢波、打籃球、打排球等，當然仲有遊艇同滑翔傘玩啦！此外，呢度更被譽為最紳士嘅海灘，皆因嚟玩嘅人不但自律，而且相當尊重其他天體人士，唔會拎住相機周圍影。
去完位於東南部嘅Brighton East Beach，跟住落嚟就北上到達位於英國東部嘅Gunton Sands （Corton Beach）。點解要指名係Corton Beach嘅Gunton Sands？原來Corton Beach並非一個完整嘅海灘，而係由4個區域所組成，當中嘅Gunton Sands係被允許進行天體活動嘅唯一一個區域。佢不但擁有廣闊嘅海灘，相當好嘅水質更適合進行各種裸體水上及水中活動，尤其係當地嘅浮潛區，更係天體人士裸潛嘅必去之地。
Ross Back Sands位於英格蘭最北嘅地方，縱然踏入7月，氣溫仍只介乎於攝氏15至28度之間，氣溫雖然宜人，但對天體愛好者嚟講可能會覺得有啲凍！不過有同好就指，如果能夠頂得順嘅話，大家將會被佢一望無際海平線所吸引，加上呢度嘅沙相當細滑關係，就算冇喺海灘上鋪上毛巾仍然覺得相當舒適。此外，佢最出名嘅就係海灘外圍嘅大片綠草帶，配合埋幾無人煙嘅環境，絕對係天體好愛者嘅天堂！
撰文：魂