場中我獨醒

同班朋友過大海，難免畀佢哋拉入賭場，不過，小弟都係觀摩為多，一來唔捨得輸錢，二來心血少，睇人哋玩兩手已經心跳加速，如果真係埋枱博一鋪，驚會誘發心臟問題。不過，唔玩兩手入賭場又有乜好做呢？可以嗒番兩杯囉！

位於金沙賭場一樓嘅仙樂都酒廊，附近就係各式各樣嘅賭枱，並為來賓提供各款啤酒同雞尾酒。歎酒之餘，舞台上仲不時有精彩表演，有美艷的舞孃，演出充滿動感又盡騷身材柔軟度嘅舞蹈，亦有中、西流行樂隊熱情演奏，同時仲有大型等離子螢幕電視機，播放體育賽事添！一邊品嘗杯中美酒，一邊冷眼旁觀周邊嘅賭客，多少有點眾人皆醉我獨醒嘅感覺。

店名：仙樂都酒廊