由議事亭前地行入大三巴，大家會發現左手邊有幢營地街市，街市所在地就係營地大街，又叫做澳門街或者大街，係澳門最早嘅商業活動中心。明清時為防海盜，朝廷派兵駐守此地，因而得名。由於有官兵撐腰，所有商業活動亦集中此地，與附近關前街和草堆街，合稱三街。三街華商更組成三街會館，會館頭頭等同華人領袖，地位唔講得笑。而兩百多年前嘅營地大街商販林立，乜都有得賣，南北雜貨、中西商品，應有盡有，而最特別就係有「妹仔」賣。
話說人販子會定時開攤，出售啲10歲以下嘅女孩，當中有父母割愛，也有拐騙回來，買嘅一般都係富家大戶，但亦有妓院嘅鴇母買下做「琵琶仔」，後來葡人接管澳門就逐漸取締，但喺2000年前後，附近又有大批「妹仔」出現，但唔係小女孩，而係十八廿二嘅流鶯，不少人都會走嚟幫襯，後嚟被有關方面大力掃蕩，於是「妹仔」又再次喺營地大街退下歷史舞台。
撰文：小德