渡海濠情：肢體語言世界通行
有指澳門繼舊年推出官方語文試用版後，旅遊局現正推出有15種語文版本嘅全新網站，配合推動旅遊客源多元化以及拓展國際市場，抵讚！但現實又係咪配合到呢？喺馬交至尊桑拿做技師嘅阿蓮同阿珍就各有睇法，一個讚可為個人增值，另一個就話肢體語言世界通行喎！
自我增值
阿蓮：
澳門近年發展真係冇得彈，軟硬件都做得咁好，好似旅遊局特意重整原有網站，提供15種語文版本，包括繁中、簡中、葡文、英文、日文、韓文、泰文、馬來文、印尼文、德文、法文、西班牙文、意大利文、俄羅斯文及阿拉伯文，真係唔睇得都嚇得，如果有關部門能提供專人培訓我哋就好囉！
阿珍：
我唔反對旅遊網站有咁多種語言提供，但我擔心提供咁多種，好易令人錯覺澳門人乜嘢語言都識，到佢哋嚟到至發現雞同鴨講，反而仲失望，計我話入鄉隨俗，識一兩種國際語言已經夠晒數啦！
阿蓮：
唔贊同你所講，事關做人幾時都要自我增值，既然有人肯先行一步，我哋都好應該向前看，配合發展，例如有個講阿拉伯語言嘅人客入到場，技師可以用佢哋語言對答，你話感覺幾親切呢？
終身受用
阿珍：
蓮妹你真係諗多咗，作為一個技師，其實一種身體語言就夠晒數，以我縱橫骨場嘅經驗，任何人客入到場，都係一個眼神、一個動作就搞掂，因為大家都有默契，真係無聲勝有聲，使乜學埋啲唔等使嘅語言，一世都冇機會用，呢啲叫浪費！
阿蓮：
你太偏激、太膚淺，識多種語言唔一定要即刻用，話唔定將來總有機會去人哋國家旅遊用得上呢？再者，就算唔講都可以識聽，知道人客當時反應乜唔係更好咩？
阿珍：
都有啲道理，但我始終認為骨場毋須培訓技師學習甚麼外國語言，反而應重點培訓肢體語言，將服務流程及質素進一步提升，咁至可以保持喺國際骨場界嘅地位，對業界及澳門旅遊都有裨益！
阿蓮：
確實骨場係講肢體語言為主，但你太着眼夜場界，總結嚟講，個人認為技師唔一定一世都係技師，學多樣嘢對自己終身受用，即使經濟上未必幫到忙，但好可能識到個朋友仔，都有好冇壞吖？
撰文：祖
攝影：生