久唔久睇娛樂新聞，都會見到有報道話某某女星搭上闊佬突然富貴，有淡出娛圈之勢，而過咗一段日子之後，又見到佢密密接工作，因而惹來遇着空心老倌嘅傳聞。呢種情況喺日本亦唔難見到，好似吉見衣世咁就懷疑遇上騙徒喇！
日本女性除咗美容有法，去到50歲都可以保持皮光肉滑之外，佢哋瘦身嘅效果亦相當驚人，點驚人呢？咪係可以想減邊度就減邊度囉！好似水着天后熊田曜子咁，早年積極瘦身，塊面同個身都Fit晒，但係胸前嘅F奶卻係一吋未減，你話係咪勁先？除咗佢之外，小師妹吉見衣世亦一樣咁厲害。今年25歲嘅衣世出道六年，原名叫做花木衣世，其面孔天真可愛，笑起上嚟活潑又夠陽光，扁起個嘴仔時又萌味十足，實在得人鍾意。身材方面，堪稱絕世靚偈！身高5呎5吋令阿妹睇落唔會好似一般嘅美少女水着妹咁矮，三圍35-23-35亦Fit到漏油，胸前堅挺嘅G奶更為胴體加添無比火辣感覺，比起出道初期更健美！
衣世雖然近年至Keep得Fit，但係憑住佢豐滿嘅上圍同可愛笑顏，即使有少少肥，亦足夠令佢備受注目，後來仲成為賽車女郎組合angelic其中一名成員，並以此身份參演唔少藝能節目。由於衣世自小鍾意睇動漫，特別鍾意睇《龍珠》，據講佢除咗係孫悟空粉絲，仲係王牌精英軍團嘅支持者，所以曾經被日本少年Jump周刊邀請佢扮演「Pure戰隊」嘅粉色戰士。不過，衣世雖然係正義嘅戰士，但係早前就捲入過一樁詐騙案當中。今年二月，有消息指一樁詐騙案嘅疑犯以及其同黨被警方拉晒，而呢位疑犯嘅同居情人就係衣世！衣世收到消息之後，即刻透過博客表示自己的確曾經同對方交往，但係對詐騙案完全唔知情喎！我梗係信佢啦，如果唔係仲可以同大家見面咩。
吉見衣世性格活潑調皮，不時將日常生活以及工作時整蠱嘅照片上載到博客，令你睇完一定會心微笑。
網址：http://ameblo.jp/iyochanstyle/
年齡：25歲
三圍：35G-23-35
身高：5呎5吋
撰文：賢