清末民初，澳門妓寨林立，客人可以喺妓院裏吃喝玩樂，但好多大老闆食慣好嘢，唔慣喺妓院裏面用餐，喜歡約囡囡上大酒家開廳擺局，即係包個廂房、訂好菜單、有埋賣唱妹同樂師駐場，人多嘅仲有麻雀同排九局安排好，同家陣喺內地開房食飯嘅規模差唔多。而當時最多大酒家嘅地方就係紅窗門街，由於好多荷蘭人住過，所以成條街嘅住宅門窗都塗上紅色因而得名，但依家就冇晒呢啲特色。當年酒樓林立，晚晚二樓嘅廳房都畀人訂晒，間間房都傳出醉人歌聲，真係名副其實紙醉金迷，老闆同囡囡飲飽食醉後，唔使返回妓院，因為酒樓嘅三四樓有住房，上樓就可以完成任務，真係諗得周到。而呢條街除咗有好多食肆外，仲係澳門第一間戲院所在地，就係設喺集賢酒店內，即家陣鴻德大廈嘅位置，雖然人面全非，但走過呢條街，真係別有一番風味，值得大家逛逛。