澳門夜場最近又進入所謂的調整期，我們在行中浸了這些年，又怎可能沒見過？一切早就習慣了，惟有等他雨過天青吧。回說澳門，早些時跟碼頭專門賣夜場套票的朋友聚頭，大家都耍手擰頭說生意難做。「你知唔知碼頭啲租幾貴？你又知唔知依家買套票嘅人同以前比，真係差好多？」他說，賣一張套票的確可以賺到一百幾十元，只是來買的香港人愈來愈少，眼見不但沒前途，而且連經營也愈來愈困難了。「你哋唔係有賣下船飛同酒店房嘅咩？」看他這樣無奈，我也忍不住問。
他聽了，更無奈。「一，一間酒店房賺三幾十蚊，不過叫做有間舖頭喺度，順便做埋；二，至於船飛，好多人已經喺外面做緊，我哋根本好被動，賣得唔多。」我聽外面說，又有場新裝修，也有新場籌備開張，市場看來很好，香港客真的不濟到這樣的田地？「你問朋友啦，依家香港經濟有幾好？無景嘅就北上，有景嘅都會嚟下澳門，但你識得幾多個會好景？」連碼頭賣套票的都嗌救命，這一行，走舊路只搶港客，確實行不通。
撰文：黃韋龍