鹹趣濠江：酒店睇游泳

位於新馬路嘅新中央酒店，原來以前只有六層高，最先嘅名叫做「總統大酒店」，但大家咪睇小佢只有六層高，喺八十年前嚟講，已經係馬交最高嘅建築物之一，而佢嘅頂樓仲開放畀人「(目及)嘢」，意思係客人可以上頂樓一覽澳門嘅景色。唔講唔知，酒店六樓仲開咗間電影院，當時只可以放啲默片，但可算澳門綜藝酒店嘅先驅，座位據講有440個，比起現時啲迷你電影院規模仲要大，而到咗戰後五十年代，電影種類多咗，大家又知唔知最受歡迎係乜嘢電影呢？四仔片？對唔住！當時仲未有，但都差唔多，片種同樣令男士們趨之若鶩，花成一蚊嚟捧場，原來係游泳紀錄片，片中洋妞以一件頭泳衣示人，喺海灘玩吓波或者游吓水，你們一定會覺得冇料到，但喺當時嚟講，啲男人睇到流晒口水，唔少老友見到洋妞條事業線，就已經即場流晒鼻血。