Kidult唔單止係大細路同童心未泯嘅意思，亦係指一班識玩、識得享受人生嘅人咁解，而喺澳門呢間Kidult Club度，仲有另一個意思，事關佢係酒吧嘅鏢隊Kidult Team嘅名字。Kidult Team成員由一班年輕上班族組成，多年嚟經常參加世界各地嘅軟式飛鏢同澳門嘅飛鏢比賽，為咗吸引更多有興趣嘅人士參與呢項運動，同埋畀一班同好有個聚腳地，於是開設咗呢間以軟式飛鏢為主題嘅Kidult Club。Club內除咗有八部嚟自美國同韓國嘅鏢機外，更有專人教授飛鏢技術。當然，嚟得呢度梗係唔少得少酌幾杯，除咗有各式日、韓同歐美紅酒、白酒同啤酒外，更有特色Cocktail，另外仲有惹味西班牙黑毛豬食譜、各款芝士及魚子醬，保證大家飲飽食醉兼玩得過癮！