搵工難，搵份高薪得嚟又唔使點做嘅更難，如果話畀你知家陣有份工，年薪20萬人民幣，提供各種保險等嘅福利，而工作內容則係專職對住電腦睇鹹網，唔知大家對呢份筍工有冇興趣呢？
睇鹹網係唔少男士嘅閒時娛樂，若能寓興趣於工作嘅話梗係吸引，難怪內地網站「安全聯盟」喺今個月16日於官方微博上貼出一則招聘「首席鑑黃師」嘅信息時，不但即刻引嚟網民嘅熱議，而喺短短一周便收到超過30萬條應徵留言希望應聘，而聯盟收到超過4千份正式嘅應聘簡歷，果真夠晒吸引！安全聯盟係由百度、騰訊、金山等十幾個網絡公司所組成嘅網絡安全組織，其責任在於優化中國互聯網使用環境，從而保護網民上網嘅權益。據聯盟嘅負責人透露，鑑黃師嘅職責在於防止淫穢網站流入網絡，又唔可以過濾咗藝術網站，對維護網上健康責任相當重大，而受聘嘅鑑黃師將於5月入職。
咪以為睇咗幾十年鹹片同上過幾千個鹹網，就以為好有把握應徵呢份筍工喎！事關聯盟開出嘅任職要求，門檻查實一啲都唔低，除咗要熟悉世界各國對淫穢色情信息嘅認定標準外，仲要熟悉中國關於淫穢相關法律，並且明瞭中國互聯網及各大營運商嘅鑑黃標準。其實就算自問具備晒以上三項要求，都未必可以順利入職。事關大家仲要經過面試同筆試至得，而當中嘅問題更被喻為具有「神級難度」，皆因佢哋嘅題目分為九個部分，包括鑑別男女色情演員膚色嘅色彩題、藝術題、法律題、外語題等，當中尤以藝術題同法律題難度至高。藝術題嘅題目係問「央視給大衞雕塑打上馬賽克引嚟爭議，還有哪些偉大的藝術作品常被誤以為是色情作品？」；法律題則問「詳述日、美、歐對色情淫穢的分級體系及優劣點」，呢啲咁嘅問題絕非一般鹹片同鹹網迷所能應付到，難怪有人話就算有興趣都未必考到啦！
撰文：魂