最近大家都非常注意南北韓嘅新聞，擔心佢哋會擦槍走火，但同時南韓有另一宗新聞，同樣令網友關注，就係政府最近通過「過度曝光法令」，規定民眾喺公眾場合不得穿着性感衣服，有人擔心連迷你裙都唔着得，你話呢單係咪大新聞！
大家認識韓國嘅少女時代、Sistar、After School等女子音樂組合，全部都係以長腿見稱，要露長腿，首要條件就係要以迷你裙示人，假如法例生效後，佢哋一律冇得穿着，你話大唔大件事？而據法例規定，只要在公共場所太暴露，一經定罪可以罰款五萬韓圜，大約三百幾蚊港元，話多唔多，話少唔少。若然着條短裙出街就要被人罰，相信冇乜女仔敢着，但女明星或者歌手，佢哋又點呢？由於法律話唔可以喺公眾地方穿着，所以演唱會或者電視台活動，就可以偷雞，但簽名活動或者街頭宣傳，咁就冇得博啦！
除咗明星歌星受影響，唔少騷女郎都大件事，事關無論車展、家電展定係動漫展，都要施展渾身解數嚟吸引觀眾，而佢哋嘅撒手鐧就係低胸衫同埋迷你裙，你話唔畀佢哋着，就一定會令吸引力大打折扣，失色好多。所以唔少網友贊成盡快取消法令，何況韓妹着迷你裙真係好好睇，冇必要自廢武功咁笨吖！
撰文：小德